Light Bill Price Increase : वाढत्या महागाईच्या झळा सोसणाऱ्या राज्यातील जनतेला आता आणखी एका महागाईचा सामना करावा लागणार आहे. महावितरणने राज्यातील वीज ग्राहकांना मोठा शॉक दिला असून, वीज दरात वाढ करण्याचा निर्णय घेतला आहे. जुलै महिन्याच्या वीज वापरापासून नवीन ‘इंधन समायोजन शुल्क’ लागू करण्यात आले आहे. यामुळे आता ऑगस्ट महिन्यात ग्राहकांच्या हातात पडणारे वीज बिल हे वाढून येणार असल्याने सर्वसामान्यांचे आर्थिक बजेट कोलमडण्याची शक्यता आहे.
गेल्या काही महिन्यांत, विशेषतः उन्हाळ्याच्या दिवसांत राज्यात विजेच्या मागणीने उच्चांक गाठला होता. ही वाढती आणि विक्रमी मागणी पूर्ण करण्यासाठी महावितरणला खुल्या बाजारातून जादा दराने व महागडी वीज खरेदी करावी लागली. या महागड्या वीज खरेदीचा आर्थिक बोजा आता थेट ग्राहकांच्या माथी मारण्यात आला आहे. याच अतिरिक्त खर्चाची भरपाई करण्यासाठी महावितरणकडून हे नवे इंधन समायोजन शुल्क आकारले जात आहे, ज्याचा थेट परिणाम तुमच्या-आमच्या वीज बिलावर होणार आहे.
या दरवाढीचा सर्वाधिक फटका घरगुती ग्राहकांना बसणार आहे. महावितरणने ग्राहकांच्या वीज वापरानुसार (स्लॅबनुसार) ही वाढ निश्चित केली आहे. नवीन दरानुसार, दारिद्र्यरेषेखालील (BPL) ग्राहकांना प्रति युनिट १० पैसे जास्त मोजावे लागतील. जे ग्राहक १०० युनिटपर्यंत वीज वापरतात, त्यांच्यासाठी प्रति युनिट २० पैशांची वाढ करण्यात आली आहे. तसेच, १०१ ते ३०० युनिटपर्यंत वीज वापरणाऱ्या ग्राहकांना ४० पैसे, तर ३०१ ते ५०० युनिट वापरणाऱ्यांना ५५ पैसे प्रति युनिटचा अतिरिक्त भुर्दंड सहन करावा लागणार आहे. ज्यांचा वीज वापर ५०० युनिटपेक्षा जास्त आहे, त्यांना सर्वाधिक म्हणजे ६० पैसे प्रति युनिट अतिरिक्त मोजावे लागतील.
येथे वाचा – लाडक्या बहिणींसाठी नवीन GR आला; या दिवशी मिळणार जुलैचा हप्ता
केवळ घरगुती ग्राहकांपुरतीच ही दरवाढ मर्यादित नाही, तर उद्योग, व्यावसायिक आणि इलेक्ट्रिक वाहन (EV) वापरकर्त्यांनाही याचा मोठा फटका बसला आहे. राज्यात आता इलेक्ट्रिक वाहनांची संख्या वाढत असतानाच, ई-वाहनांच्या चार्जिंग स्टेशनवरील विजेच्या दरात ३० पैसे प्रति युनिटने वाढ करण्यात आली आहे. याव्यतिरिक्त, लहान आणि मोठ्या उद्योगांना तसेच व्यावसायिकांना त्यांच्या वीज दाबाच्या (High/Low Tension) वर्गवारीनुसार प्रति युनिट २५ ते ६० पैशांपर्यंत जादा रक्कम मोजावी लागणार आहे.
एकंदरीत, महावितरणच्या या निर्णयामुळे सर्वच स्तरांतील ग्राहकांच्या खिशाला कात्री लागणार आहे. आधीच पेट्रोल, डिझेल आणि जीवनावश्यक वस्तूंच्या वाढलेल्या किमतींमुळे जनता त्रस्त असताना, आता या वाढीव वीज बिलामुळे चिंता आणखी वाढली आहे. आता वाढत्या बिलापासून स्वतःला वाचवण्यासाठी ग्राहकांना विजेचा काटकसरीने वापर करण्याशिवाय दुसरा कोणताही पर्याय उरलेला नाही.
