PM Kisan Scheme : शेतकरी मित्रांनो, पीएम किसान योजनेचे २,००० रुपये तुमच्या खात्यात यायचे अचानक थांबले आहेत का? किंवा येणारा २१ वा हप्ता आपल्याला मिळेल की नाही, याची तुम्हाला चिंता वाटतेय? मग ही माहिती तुमच्यासाठी अत्यंत महत्त्वाची आहे. सध्या शासनाने अपात्र लाभार्थ्यांची एक ‘संशयास्पद यादी’ काढली आहे आणि त्यांची ‘फिजिकल व्हेरिफिकेशन’ (प्रत्यक्ष पडताळणी) सुरू केली आहे. जर तुम्ही हे व्हेरिफिकेशन वेळेत केले नाही, तर तुमचे हप्ते कायमचे बंद होऊ शकतात. नक्की काय आहे हे प्रकरण आणि तुम्हाला कोणता अर्ज भरून द्यायचा आहे? जाणून घ्या सविस्तर…
नेमकी समस्या काय?
तुम्ही पाहिलं असेल की मागच्या काही हप्त्यांपासून पीएम किसान योजनेच्या लाभार्थ्यांची संख्या कमी होत चालली आहे. १९ व्या आणि २० व्या हप्त्याच्या वेळी लाखो शेतकरी या योजनेतून बाद झाले. याचं मुख्य कारण म्हणजे शासनाची ‘फिजिकल व्हेरिफिकेशन’ मोहीम.
सोप्या भाषेत सांगायचं तर, बऱ्याच ठिकाणी एकाच घरात अनेक लोक पैसे घेत आहेत, काही लोकांनी जमिनी विकल्या तरीही पैसे घेत आहेत, किंवा जे मयत झालेत त्यांच्या नावानेही हप्ते जमा होत आहेत. हे थांबवण्यासाठी आता कृषी विभागाने अशा ‘संशयास्पद’ (Suspicious) वाटणाऱ्या शेतकऱ्यांची एक यादी तयार केली आहे. जर तुमचं नाव या यादीत असेल, तर तुम्हाला स्वतःची पात्रता सिद्ध करण्यासाठी एक अर्ज भरून द्यावा लागणार आहे.
येथे वाचा – शेतात पीक नाही.. अशी होणार ई-पीक पाहणी; ‘या’ तारखेपर्यंत करा ऑफलाईन नोंद..
कुणाकुणाला भरावा लागेल हा अर्ज?
हा नियम सरसकट सगळ्यांना लागू नाही, पण खालील प्रकरणांमध्ये तुमची पडताळणी होऊ शकते:
एकापेक्षा जास्त लाभार्थी: एकाच रेशन कार्डवर किंवा एकाच घरातून जर एकापेक्षा जास्त लोक हप्ता घेत असतील.
जमीन विकलेले शेतकरी: ज्यांनी आपली शेतजमीन विकली आहे, पण अजूनही योजनेचा लाभ घेत आहेत.
मयत लाभार्थी: जर मूळ लाभार्थी मयत झाला असेल आणि वारसाने ती जमीन पुढे गेली असेल.
इन्कम टॅक्स भरणारे: जे शेतकरी कर भरतात किंवा इतर मोठ्या नोकरीत आहेत.
महत्त्वाचा मुद्दा: पीएम किसान योजनेसाठी ‘कुटुंब’ म्हणजे पती, पत्नी आणि १८ वर्षांखालील मुले. जरी एका रेशन कार्डवर तुमचे आई-वडील, भाऊ असा मोठा परिवार असेल, तरी या योजनेच्या नियमानुसार एका कुटुंबात फक्त एकालाच लाभ मिळतो.
अर्जामध्ये काय माहिती द्यावी लागेल?
जर कृषी सहायकाने तुम्हाला बोलावले किंवा तुमचे नाव यादीत असेल, तर तुम्हाला एका अर्जाद्वारे हमी द्यावी लागते. यात प्रामुख्याने खालील गोष्टी तपासल्या जातात:
तुमचं नाव, गाव आणि मोबाईल नंबर.
तुमचा ‘फार्मर आयडी’ (Farmer ID) (हा तुमच्या कृषी सहायकाकडे मिळेल).
जमीन धारणा: तुम्ही सदर जमीन १ फेब्रुवारी २०१९ पूर्वी खरेदी केली आहे का? (त्यानंतर जमीन घेतली असल्यास तुम्ही पात्र ठरत नाही).
येथे वाचा – शेतकऱ्यांनो! पिक विमा निधी आला; पहा पिक विमा कधी मिळणार?
कोण नक्की बाद होणार?
जर तुम्ही खालीलपैकी कोणत्याही गटात मोडत असाल, तर तुम्हाला अर्ज भरूनही लाभ मिळणार नाही:
आजी-माजी मंत्री, खासदार, आमदार, जिल्हा परिषद अध्यक्ष, महापौर.
सरकारी नोकरदार (फक्त गट-ड किंवा शिपाई पद वगळून बाकी सर्व अपात्र).
मागील ५ वर्षांत इन्कम टॅक्स भरलेली व्यक्ती.
दरमहा १०,००० रुपयांपेक्षा जास्त पेन्शन घेणारे निवृत्ती वेतनधारक.
डॉक्टर, वकील, इंजिनिअर, सीए (CA) यांसारखे नोंदणीकृत व्यावसायिक.
सोबत कोणती कागदपत्रे जोडावीत?
तुमचे व्हेरिफिकेशन पूर्ण करण्यासाठी अर्जासोबत खालील कागदपत्रांची झेरॉक्स जोडणे गरजेचे आहे:
• पती, पत्नी आणि १८ वर्षांखालील मुलांचे आधार कार्ड.
• चालू महिन्यातील सातबारा उतारा (ज्यावर पिकांची नोंद असेल तर उत्तम).
• रेशन कार्डची झेरॉक्स.
• जर मूळ लाभार्थी मयत असेल, तर त्यांचा मृत्यूचा दाखला आणि वारस नोंदीचा फेरफार.
येथे वाचा – गव्हाचे फुटवे वाढवण्यासाठी घरगुती उपाय; गव्हाला फुटवेच फुटवे.. पहा शून्य खर्चाचा भन्नाट प्रयोग..
आता तुम्हाला काय करायचं आहे?
शेतकरी मित्रांनो, जर तुमचा मागचा हप्ता आला नसेल किंवा तुम्हाला या योजनेत टिकून राहायचे असेल, तर आजच तुमच्या गावातील कृषी सहायकाची (ग्रामसेवक/कृषी सेवक) भेट घ्या.
त्यांना विचारा की, “माझं नाव संशयास्पद यादीत आहे का? मला कोणता अर्ज भरून द्यायचा आहे का?” जर त्यांनी ‘हो’ म्हटले, तर वर सांगितलेली कागदपत्रे घेऊन तात्काळ अर्ज सादर करा. एकदा तुमची माहिती ऑनलाईन अपडेट झाली की, अडकलेले हप्ते पुन्हा सुरू होतील.
उशीर करू नका, कारण एकदा सिस्टीममधून नाव बाद झाले की ते पुन्हा सुरू करणे खूप किचकट काम आहे!
टीप: ही माहिती पीएम किसान योजनेच्या सध्याच्या पडताळणी प्रक्रियेवर आधारित आहे. अधिकृत माहितीसाठी आपल्या तालुका कृषी अधिकाऱ्यांशी संपर्क साधा.
