Mhada Lottery Mumbai : मुंबईत स्वतःचं हक्काचं घर असावं, हे प्रत्येक सर्वसामान्याचं स्वप्न असतं. जर तुम्हीही म्हाडाच्या लॉटरीची आतुरतेने वाट पाहत असाल, तर तुमच्यासाठी एक गुड न्यूज आहे! २०२५ मधली निराशा विसरा, कारण २०२६ मध्ये म्हाडा एक मोठी संधी घेऊन येत आहे. पण या वेळी काही नियम बदलले आहेत आणि घरांच्या पेमेंट पद्धतीतही मोठा फरक पडला आहे. काय आहेत हे नवीन बदल? आणि नेमकं लॉटरीचं वेळापत्रक काय असणार? जाणून घेण्यासाठी हा ब्लॉग नक्की वाचा!
नमस्कार मित्रांनो! मुंबईत घर घेणं हे फक्त एक व्यवहार नसून ते एका स्वप्नांची पूर्तता असते. गेल्या अनेक महिन्यांपासून किंवा वर्षांपासून तुम्ही ज्या बातमीकडे डोळे लावून बसला होतात, ती आनंदाची बातमी आता समोर आली आहे. २०२५ मध्ये म्हाडाची लॉटरी न आल्यामुळे अनेकांचा हिरमोड झाला होता, पण २०२६ हे वर्ष तुमच्यासाठी आशेचा किरण घेऊन येत आहे. आजच्या या ब्लॉगमध्ये आपण म्हाडाच्या मुंबई लॉटरीबद्दलची इत्यंभूत माहिती साध्या आणि सोप्या भाषेत समजून घेणार आहोत.
लॉटरी कधी जाहीर होणार? (वेळापत्रक)
तुम्ही कॅलेंडरवर आतापासूनच नोट करून ठेवा. म्हाडाकडून मिळालेल्या ताज्या अपडेटनुसार, मुंबई लॉटरीची जाहिरात मार्च २०२६ मध्ये प्रसिद्ध होण्याची शक्यता आहे. त्यानंतर कागदपत्रांची पडताळणी आणि अर्ज भरण्याची प्रक्रिया पार पडेल आणि साधारणतः एप्रिलच्या शेवटच्या आठवड्यात किंवा मे महिन्यामध्ये लॉटरीची सोडत (Draw) जाहीर केली जाईल.
घरे नक्की कुठे आणि किती असणार?
या वेळी म्हाडा जवळपास ४,००० ते ५,००० घरांसाठी लॉटरी काढणार आहे. आनंदाची बाब म्हणजे ही घरे मुंबईतील मोक्याच्या ठिकाणी असणार आहेत.
विक्रोळी (कन्नमवार नगर): इथे जवळपास १३०० घरांचे बांधकाम सुरू आहे, ज्यातील काही ८४ घरे तर ‘रेडी टू मूव्ह’ (राहण्यासाठी तयार) आहेत.
सायन (प्रतीक्षा नगर): इथे ५०० घरांचे काम सुरू आहे.
गोरेगाव पश्चिम (पत्राचाळ): हे एक महत्त्वाचे लोकेशन आहे. इथे सुमारे २५०० घरांचे काम सुरू आहे.
याशिवाय बोरीवली, मालाड (मालवणी), चारकोप आणि शिंपोली या भागातही काही घरे उपलब्ध असणार आहेत.
‘अंडर-कन्स्ट्रक्शन’ घरांचा नवा फंडा!
म्हाडाने या वेळी एक धोरणात्मक बदल केला आहे. फक्त तयार घरेच नाही, तर जी घरे पुढील १ ते ३ वर्षांत (२०२९-३० पर्यंत) पूर्ण होणार आहेत, अशा ‘अंडर-कन्स्ट्रक्शन’ घरांचाही लॉटरीमध्ये समावेश केला जाणार आहे. यामुळे घरांची संख्या वाढेल आणि जास्त लोकांना संधी मिळेल.
पैसे भरण्याचे नियम बदलले?
हा मुद्दा खूप महत्त्वाचा आहे. जर तुम्हाला बांधकाम सुरू असलेलं (Under Construction) घर लागलं, तर पूर्वीसारखे ‘२५% आणि ७५%’ असे पैसे भरण्याचे नियम नसतील. खाजगी विकासकांप्रमाणे (Private Builders) आता बांधकामाच्या टप्प्यानुसार पैसे भरावे लागतील.
उदाहरणार्थ:
पायाभरणी झाली: २०%
७ वा मजला पूर्ण: २०%
१४ वा मजला पूर्ण: २०%
…अशा ५ टप्प्यांमध्ये तुम्हाला पैसे भरावे लागतील. याचा फायदा असा की, तुम्हाला एकदम पैसे भरावे लागणार नाहीत, पण दुसरीकडे होम लोनचे हप्ते आणि घराचा ताबा मिळण्यातील वेळ यांचा ताळमेळ तुम्हाला घालावा लागेल.
आतापासूनच तयारीला लागा!
ऐनवेळी धावपळ नको असेल, तर तुमची कागदपत्रे आताच तपासा.
डोमिसाईल सर्टिफिकेट (Domicile): हे २०१८ नंतरचे असावे.
उत्पन्नाचा दाखला/ITR: हे आर्थिक वर्ष २०२५-२६ चे असावे.
इतर कागदपत्रे: पॅन कार्ड, आधार कार्ड आणि नावात काही तफावत असेल तर ती आताच दुरुस्त करून घ्या.
थोडक्यात सांगायचं तर या वेळी संधी मोठी आहे, पण सोबतच सतर्क राहणंही गरजेचं आहे. अंडर-कन्स्ट्रक्शन घरांसाठी थोडी वाट पाहावी लागेल, पण मुंबईत हक्काचं घर मिळवण्यासाठी ही प्रतीक्षा नक्कीच फळाला येईल.
