सिडकोच्या घरांना मोठा प्रतिसाद.. तब्बल एवढ्या लोकांनी केली नोंदणी..

Cidco Housing : नवी मुंबईसारख्या शहरात स्वतःचं घर असावं, हे प्रत्येक मध्यमवर्गीयाचं स्वप्न असतं. पण आकाशाला भिडलेले घरांचे भाव बघून अनेकदा आपण माघार घेतो. जर तुम्हीही स्वस्तात मस्त घराच्या शोधात असाल, तर ही बातमी खास तुमच्यासाठी आहे! सिडकोने आणलेल्या एका योजनेला लोकांनी अक्षरशः डोक्यावर घेतलं आहे. काय आहे ही योजना आणि तुम्हाला याचा लाभ कसा घेता येईल? चला जाणून घेऊया…

मित्रहो, सध्या नवी मुंबईत घरांच्या किमती ऐकल्या की सर्वसामान्यांचे डोळे पांढरे होतात. पण याच महागाईच्या काळात सिडको (CIDCO) ने सर्वसामान्यांसाठी, विशेषतः मध्यमवर्गीय आणि अल्प उत्पन्न गटातील लोकांसाठी एक सुवर्णसंधी आणली आहे.

एवढ्या लोकांनी केली नोंदणी

सिडकोने ‘प्रथम येणाऱ्यास प्रथम प्राधान्य’ (First Come First Serve) या तत्वावर तब्बल ४,५०८ घरांची विक्री योजना सुरू केली आहे. आणि काय सांगावं, या योजनेला लोकांचा इतका जबरदस्त प्रतिसाद मिळतोय की, आतापर्यंत तब्बल ३३,००० हून अधिक इच्छुकांनी यासाठी ऑनलाईन नोंदणी केली आहे. यावरूनच लक्षात येतं की, स्वस्त आणि हक्काच्या घरांची गरज किती मोठी आहे.

येथे वाचा – म्हाडाचे घर घेताना या 5 गोष्टी चेक करा.. नाहीतर आयुष्यभर होईल पश्चाताप

ही घरं आहेत तरी कुठे आणि किंमत काय?

आता तुम्हाला प्रश्न पडला असेल की ही घरं नेमकी आहेत कुठे? तर ही घरं नवी मुंबईतील तळोजा, घणसोली आणि कळंबोली यांसारख्या मोक्याच्या ठिकाणी आहेत. किमतीचा विचार केला तर:
आर्थिक दुर्बल घटकांसाठी (EWS): २५.८१ चौरस मीटरची १,११५ घरं उपलब्ध असून, यांची किंमत २२ लाख १८ हजार रुपयांपासून सुरू होते.
अल्प उत्पन्न गटासाठी (LIG): २९.८२ चौरस मीटरची ३,३९३ घरं असून, यांची किंमत ३७ लाख ९५ हजार रुपयांपर्यंत आहे.

सर्वात आनंदाची गोष्ट म्हणजे, आर्थिक दुर्बल घटकातील अर्जदारांना ‘प्रधानमंत्री आवास योजने’अंतर्गत तब्बल अडीच लाख रुपयांचे अनुदानही मिळणार आहे. त्यामुळेच या गटातून अर्जांचा पाऊस पडला आहे.

येथे वाचा – कसं दिसतं सिडकोचं 22 लाखांचं घर? पहा  सॅम्पल फ्लॅटसह A टू Z माहिती..

बऱ्याचदा सरकारी योजनांमध्ये एजंट किंवा खासगी कंपन्यांचा हस्तक्षेप असतो, पण इथे तसं काहीच नाही. ही संपूर्ण प्रक्रिया सिडकोच्या पणन विभागातील अधिकारी स्वतः हाताळत आहेत, त्यामुळे पूर्ण पारदर्शकता आहे. विशेष म्हणजे, ही सर्व घरं पूर्णपणे तयार (Ready to Move) आहेत. तुमची निवड झाली की लगेच घराचा ताबा मिळण्याचे नियोजन सिडकोने केले आहे. म्हणजे “बुकिंग करा आणि राहायला जा..

तुम्हाला काय करायचं आहे?

जर तुम्हालाही या योजनेचा लाभ घ्यायचा असेल, तर सिडकोच्या अधिकृत वेबसाईटवर (cidcofcfs.cidcoindia.com) जाऊन नोंदणी करावी लागेल. नोंदणी फी फक्त २३६ रुपये आहे.

येथे वाचा – नशीब असावं तर असं! सोडतीआधीच ठरले विजेते; म्हाडा पुणे लॉटरीत तुमचं नाव आलंय का?

लक्षात ठेवा ही तारीख

ज्यांनी नोंदणी केली आहे आणि ज्यांची कागदपत्र पडताळणी पूर्ण झाली आहे, अशा पात्र अर्जदारांसाठी २८ डिसेंबर हा दिवस खूप महत्त्वाचा आहे. या दिवशी सकाळी ११ वाजता तुम्हाला तुमच्या पसंतीचे घर निवडण्याची (Slot Booking) संधी मिळणार आहे.