राज्यात हवामानात पुन्हा एकदा अचानक मोठा बदल झाला असून, अवकाळी पावसाने जोरदार हजेरी लावली आहे. बुधवारी सायंकाळी मध्य महाराष्ट्र आणि मराठवाड्यातील काही भागांत मेघगर्जनेसह पाऊस झाला, तर काही ठिकाणी गारपिटीचा तडाखा बसला. हवामान खात्याने दिलेल्या ताज्या माहितीनुसार, आज (गुरुवारी) आणि उद्या राज्याच्या विविध भागांत पावसाची शक्यता असून तब्बल २८ जिल्ह्यांना अलर्ट देण्यात आला आहे.
आज आणि उद्या कसे राहील हवामान?
हवामानशास्त्र विभागाच्या अंदाजानुसार, आज कोकण, दक्षिण मध्य महाराष्ट्र, मराठवाडा आणि पूर्व विदर्भात मेघगर्जनेसह हलक्या ते मध्यम पावसाच्या सरी कोसळण्याची शक्यता आहे. तसेच उद्याही दक्षिण मध्य महाराष्ट्र, मराठवाडा आणि विदर्भातील काही भागांत पावसाचा अंदाज वर्तवण्यात आला आहे. उर्वरित राज्यात मात्र ढगाळ वातावरणासह तुरळक ठिकाणी हलक्या सरी पडू शकतात.
कोणत्या जिल्ह्यांमध्ये आहे पावसाची शक्यता?
हवामान विभागाने राज्यातील २८ जिल्ह्यांमध्ये विजांच्या कडकडाटासह पावसाचा इशारा दिला आहे. यामध्ये खालील जिल्ह्यांचा प्रामुख्याने समावेश आहे:
कोकण: रायगड आणि रत्नागिरी.
मध्य महाराष्ट्र: धुळे, नंदुरबार, जळगाव, नाशिक, अहिल्यानगर, पुणे, कोल्हापूर, सातारा, सांगली आणि सोलापूर.
मराठवाडा: छत्रपती संभाजीनगर, जालना, परभणी, बीड, हिंगोली, नांदेड, लातूर आणि धाराशिव. (या जिल्ह्यांत तुरळक ठिकाणी गारपिटीसह पावसाची शक्यता आहे).
विदर्भ: अकोला, अमरावती, भंडारा, चंद्रपूर, गडचिरोली, गोंदिया, नागपूर, वर्धा आणि यवतमाळ. (येथे वादळी वाऱ्यासह पावसाचा इशारा देण्यात आला आहे).
वाऱ्याचा वेग आणि हवामानातील बदल
सध्या मन्नारच्या आखातापासून तमिळनाडू ओलांडून दक्षिण अंतर्गत कर्नाटकपर्यंत एक द्रोणीय स्थिती (हवेच्या कमी दाबाचा पट्टा) निर्माण झाली आहे. यामुळे राज्यात पावसाळी वातावरण तयार झाले आहे. मागील २४ तासांत वाऱ्याचा वेगही लक्षणीय होता. कोकणातील कर्जत येथे ३७ किमी प्रतितास, कोल्हापूरमध्ये ५० किमी प्रतितास, तर मराठवाड्यातील हिंगोली येथे ३१ किमी प्रतितास वेगाने वारे वाहत होते.
शनिवारपासून तापमानात वाढ
अवकाळी पावसामुळे चिंतेचे वातावरण असले तरी, शनिवारपासून पावसाचा जोर कमी होण्याची शक्यता हवामान खात्याने वर्तवली आहे. पावसाचा प्रभाव ओसरताच राज्यात पुन्हा एकदा तापमानात वाढ होईल आणि उन्हाचा चटका जाणवू लागेल. दरम्यान, या बदलत्या हवामानात आणि पावसाच्या शक्यतेमुळे शेतकऱ्यांनी आपल्या पिकांची आणि काढणीला आलेल्या शेतमालाची योग्य ती काळजी घेणे आवश्यक आहे.
